Blog

Allu Paise mio

di Emilio De Paola

(tratto da: L’Anivulu, Poesie in dialetto sangiovannese. Edizioni Pubblisfera)

Oh! paisiellu mio pregiatu e caru,
chi pigli r’a curina e r’a Rifisa,
u corsu corsu fai na bella scisa,
jungiennu pue allu ponte e l’Olivaru.
Si nturniatu e timpe e de valluni,
e pini, verze frische e cuntavuni.

Sì tuni lu paise e r’e patate,
e r’o Cuschinu e de le Pagliarelle,
e r’e sieliche longhe e de minelle
e de spiche r’o migliu mperticate.
E r’e mali vestuti e de scozuni,
e re fatigaturi e de lindruni.

Nessunu chi te guarda pò scordare
tutte e bellizze tue rustiche e pure
e de lu vinu tue chillu sapure
ch’è propriu nu piacire a t’embriacare.
Nessunu pò scordare a’ paisanella
chi ppe nente runa alli ciarvella.

I tiempi e ligna fuorti e de focuni,
s’arrustu alla vampata e sozizelle
e le cipulle cotte ncinneracchiu
hau lu sapure re le vozzarelle.
Nu tassiellu e casu pecurinu
accumpagnatu a nu becchieri e vinu.

C’é lu trissette pue trarizionale,
ntra n’angulu e cellaru, fore via
ccu lu patrune chi te lassa all’umbra
u sutta nsiemi a tutta a cumpagnia.
E biva spizzicannu sulu, sulu,
riciennu ca’ cià fà a nu caparulu.

Ma infine si ne niesciu tutti allegri,
caminu c’assumigliu equilibristi,
sminuzzu la politica cu nente,
se sientu n talentu re statisti.
E mpartu tutta l’anima scordata:
scangiu lu “Piave” ccu la “Risperata”.

Ma si guardamu propriu ntra sse cose,
c’è tutta la poisia re chissa terra,
cu ne puotu capire l’atra gente
si un sau ca lu bullitu è na minerra?
A’ scilla e r’o finuocchiu, u piperiellu,
chissu è lu pregiu e ssu paise biellu!

Emilio De Paola, è nato tanto tempo fa a San Giovanni in Fiore. Da sempre scrive su giornali locali; è felice di vivere la sua sangiovannesità nel suo meraviglioso paese.

Ringraziamo Emilio De Paola per averci concesso la pubblicazione di questi lavori.